Çarsenbe künü, oktâbr 16-sında Aqyarnın bir qaç soqağı qaza sebebinden suvsız qaldı.
Bunı yerli "Vodokanalı"nıñ memuriyeti bildire.
"Şeer suv ağında olğan qaza neticesinde bugün, oktâbr 16-sında, saat 9:30-dan saat 17:00-ğace Eskadrennaya soq., Beregovaya soq., İnjenernaya soq., Çernışevskogo soq., Çelüskintsev soq., Gerstsena soq., Mendeleyeva soqaqlarında suv teminatı olmaycaq", - denile beyanatta.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
