Rusiye prezidenti Vladimir Putinni martnıñ 18-nde Aqyarda bekleyler. «Krım24» telekanalı bildirgenine köre, kelgen jurnalistlerniñ sıcağı baqıldı.
Telekanal malümatına köre, şeerde Keriç köprü qurucılarını mukâfatlandıruv merasimi, Qırım ve Aqyarnıñ Rusiye yolbaşçılarınen ve cemaatçılıqnen körüşüv ötkermege planlaştırıla.
TASS agentligi Kreml malümatına esaslanıp, Putin martnıñ 18-nden 19-na qadar işğal etilgen Qırımnı ziyaret etecek, dep bildirdi.
Soñki sefer Putin Qırımğa bu sene yanvar ayında kelgen edi. Yanvarniñ 9-nda Aqyarda edi. Putin Qara deñizde Rusiye Qara deñiz ve Şimaliy flot talimleriniñ ketişatını «Marşal Ustinov» raketa gemisinden baqtı. Yanvarniñ 10-nda Rusiye prezidenti Yaltada Kreml kontrolindeki Qırım ve Aqyar reberlerinen körüşip, «yarımada inkişafınıñ içtimaiy-iqtisadiy meselelerini» muzakere etti.
Ukraina Tış işler nazirligi Putinniñ daa bir qanunsız Qırım ziyaretine qarşı narazılıq bildirdi. Yanvarni 10-nda Rusiye Tış işler nazirligi, Kyivniñ notasını baqmayıp qaytarğanını bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
