Aqyarda avgustnıñ 8-nde saba üç yañı COVID-19 hastası qayd etildi. Hastalanğanlar arasında – eki aqyarlı pensioner ve şeerge raatlanmağa kelgen er adamı.
Bu aqta şeerniñ Rusiye ükümetiniñ saytında haber etile.
«Altı kişi yahşı olğan soñ hastahaneden çıqarıldı. Umumen yılnıñ başından Aqyarda 374 insan yañı koronavirus yuqunçına oğradı. 312 kişi tüzeldi, 11 insan vefat etti», – dep bildirile haberde.
Akimiyetniñ malümatına köre, al-azırda 40 kişi hastahanede buluna, 178 insan yuqunç hastahanesinde közetile, №9 şeer hastahanesinde 107 insan qala, 233 insan yaşağan yerinde közetile.
Avgustnıñ 1-nde berilgen malümatqa köre, Aqyarda 4 pensioner COVID-19 hastalığına oğradı, avgustnıñ 5-nde koronavirusnen hastalanğan esli başlı adamnıñ vefatı aqqında haber etildi.
Keçken künü Qırımda 27 koronavirus hastası qayd etildi. Qırımda, yerli akimiyetniñ malümatına köre, 1437 yañı koronavirus hastası qayd etildi. 78-i çetelden keldi, 112-si qomşu Rusiyeden kelgenler ve olarnen alâqada olğanlar. 1038 insan yahşı oldı, 16 hasta koronavirustan vefat etti. Aqyarda 371 insan koronavirus yuqunçına oğradı, 306 kişi tüzeldi, 11 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
