Aqyarda patlavlardan soñ yerli ve Rusiye telegram kanalları şeerde yanğınlar aqqında yazalar.
Hususan, ''Krımskiy veter'' telegram-kanalı Aqyarnıñ şimaliy tarafında, em de Rusiyeniñ Belbek arbiy ava limanı yanında yanğın çıqqanını bildire.
Şeerniñ rusiyeli başı Mihail Razvojayev dey ki, Rusiye ava mudafaası nişannı urıp tüşürgen ve onıñ parçaları Lübimovkada tüşken.
Daa evel Qırım.Aqiqat mühbiri, Aqyarda eñ azından beş patlav eşitildi, dep bildirgen edi. Bundan evel o, şeerde ava telükesi aqqında haber etken edi. "Suspilne" yazğanına köre, şeerde patlavlar eşitildi. Cemaat yayınlayıcısınıñ malümatına köre, patlavlar Kezlev rayonında qayd etildi.
Bundan ğayrı, Rusiye ve Qırım telegram kanalları Kefe, Razdolnıy ve Gvardeyskiy şeerlerinde patlavlar aqqında haber ete ediler.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
