Şeerde qara tuman – Aqyarnıñ merkeziy bayırından yahşı körüne. Acele yardım maşinalarınıñ sirenaları da eşitile.
Aqyarda üç küçlü patlav oldı, dep bildirdi Qırım.Aqiqat mühbiri. Patlav dalğasından camlar titredi.
Şeerde qara tuman – Aqyarnıñ merkeziy bayırından yahşı körüne. Acele yardım maşinalarınıñ sirenaları da eşitile.
Aqyarnıñ Rusiye yolbaşçısı Mihail Razvojayev Rusiye Federatsiyasınıñ Qara deñiz flotu ştabına raketa darbesi endirildi, dep bildirdi. Onıñ aytqanına köre, Lunaçarskiy teatri yanında bir parça tüşti.
Bundan evel bugün yerli Telegram kanalları Rusiye arbiyleri Aqyarda tuman perdesini qullandı, dep bildirdi. Rusiye Mudafaa nazirligi Qırımğa qarşı ücüm aqqında bildirdi. Müessise bir raketa ve eki uçucısız urıp tüşürildi, dep bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
