Saban ayınıñ 6-nda aqşam Aqyarda patlav ve ava mudafaasınıñ çalışmasına oşağan yüksek sesler eşitildi, Aqyarnıñ Rusiye yolbaşçısı Mihail Razvojayev şeerge uçucısız uçaqlarnıñ ücüm etkenini bildirdi.
Onıñ aytqanına köre, Rusiye ava mudafaası Qara deñizde, Kaça rayonında, yalıdan bayağı uzaqlıqta dört uçucısız uçaqnı urıp tüşürdi. Aynı zamanda "Krımskiy veter" telegram-kanalınıñ abunecileri Rusiyeniñ "Belbek" ve "Kaça" arbiy ava limanları yanında patlavlar aqqında bildire. Telegram kanalınıñ malümatına köre, patlavlar şeerniñ şimaliy qısmında eşitildi. Bundan da ğayrı, patlavlar Saq, Zaozernoye ve Rusiye arbiy ava limanı yerleşken Novofedorovkada da eşitildi, dep bildirilgen edi.
Şimdiki vaqıtta avadan qoruv sistemasınıñ çalışması ya da zarar körgenleri aqqında malümatnı tasdıqlap olamaymız. Rusiye arbiyleri vaziyetni şimdilik izaatlamay.
2022 senesi arman ayından ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve "ava mudafaa sistemasınıñ işi" dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
