Martnıñ 28-nde aqşam Aqyarda Rusiye uçağı tüşti, dep bildire yerli telegram kanalları. Rusiye kontrolindeki şeer yolbaşçısı Mihail Razvojayev bu malümatnı tasdıqladı.
Berilgen malümatqa köre, yerli vaqıtnen saat 18:00 şeerniñ üzerinde patlav oldı. "ÇP Sevastopol", "Krımskiy veter" ve "ÇP Krım" telegram kanalları yanğan uçaq ve uçucınıñ tüşkenini köstergen videolarnı derc etmege başladı.
Rusiyege qoltutqan arbiy bloger Vladimir Romanovnıñ bildirgenine köre, şeerde Rusiye Federatsiyasınıñ Su-35 uçağı tüşürildi.
Öz nevbetinde "Krımskiy veter" telegram kanalı öz menbalarına atıf etip, Rusiye uçağınıñ tüşürilmesiniñ sebebi "Rusiye Ava mudafaasınıñ dost ateşi" ola bile, dep bildirdi.
Rusiye kontrolindeki Aqyar yolbaşçısı Mihail Razvojayev öz telegram kanalında şeer yalısında Rusiye arbiy uçağınıñ tüşkenini tasdıqladı.
Uçaqnıñ aydavcısı avadan tüşti. Onı yalıdan eki yüz metr mesafede Aqyar qurtaruv hızmetiniñ qurtarıcıları taptı. Onıñ ayatına iç telüke yoq, dep bildirdi Mihail Razvjayev.
Razvojayevniñ aytqanına köre, vatandaş obyektleri zarar körmedi. Razvojayev yıqıluv sebepleri aqqında haber etmedi.
Qırım.Aqiqat mühbiri bildirdi ki, uçaq tüşmezden evel ava mudafaasınıñ işi eşitildi. Atış sesleri Şimaliy moldan daa uzaqlarda eşitile edi. Bu, mühbirniñ aytqanına köre, İnkermanda ava mudafaası sisteması çalışqanı aqqında iddialarnen razı olmağa imkân bere.
Rusiye Mudafaa nazirligi vaziyet aqqında şimdilik bir şey aytmadı.
Ukrayina Mudafaa nazirligi bu vaqianı daa izaatlamadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
