Aqyarnıñ Rusiye telegram kanalları iyülniñ 12-nde saba şeerde atış ve patlav sesleri aqqında bildire.
«ÇP/Sevastopol» Telegram kanalı yerli sakinlerniñ malümatına esaslanıp, patlav ve atış sesleri Kazaçya körfezi, Fiolent, Stoletovskiy ve Ostrâkov caddeleri yanında eşitildi, dep yaza.
Aqyardaki patlav sesleri aqqında malümatnı mühbirimiz de tasdıqladı.
Aqyarnıñ Rusiye yolbaşçısı Mihail Razvojayev bu sesler Rusiye arbiyleriniñ Kazaçya körfezinde keçirgen «talimlerinen» bağlı, dep ayttı.
«Kazaçya körfezi rayonında arbiy bölük poligonında silâdan atışnen askerler azırlıq köre», – dep yazdı Razvojayev Telegram kanalında.
Mayısnıñ 10-nda Azatlıq Radiosınıñ leyhası olğan Qırım.Aqiqatjurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
