Aqyarda deñizde atış ve patlav sesleri eşitile, Rusiye kontrolindeki Aqyar yolbaşçısı Mihail Razvojayev Rusiye Qara deñiz flotunıñ «talim atışları» aqqında bildirdi.
«Körem, bazıları suvda atış videolarını paylaşa. Flotumıznıñ talimleri kete. Tınç qalamız!», – dep yazdı Razvojayev Telegram kanalında.
Noyabrniñ 16-nda Aqyar sakinleri şeerde küçlü sesler oldı, dep şikâyet etti. Şeerniñ Rusiye yolbaşçısı Mihail Razvojayev bildirgenine köre, Rusiye Qara deñiz flotu talimler keçirdi ve sirenler teşkerildi.
Aqyarda noyabrniñ 27-ne qadar «sarı» terror telükesiniñ seviyesi uzatıldı. O, Aqyarda Rusiye Qara deñiz flotunıñ ştabına «uçucısız ücüm etken» soñ kirsetildi.
Aqyardan ğayrı, «sarı» seviye Qırımnıñ şimalinde, Keriçte ve Yedi Quyu rayonında, Qırımnıñ Rusiye nazirligi obyektlerinde devam ete.
Avgustnıñ soñunda Aqyarda işğal altındaki yarımadada olğan patlavlar sebebinden sığınaqlar teşkerilip başlandı. Aqyarnıñ Rusiye yolbaşçısı Mihail Razvojayev şeerde mağaz ve sığınaqlarnıñ 82%-ı temizlendi, dep bildirdi.
Oktâbr ayında Aqyarnıñ eski evlerinde sığınaq malümatları tarqatıldı. Yerli sakinlerniñ malümatına köre, mağazlar insanlarnı qabul etmege azır degil.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
