Aqyarda yerli vaqıtnen saba saat 10:40-ta bir qaç patlav sesi eşitilgen, şeerde ava telükesi signalı berilgen. Bunı Qırım.Aqiqat mühbiri haber ete.
Şeerde patlav sesleri eşitilgeni aqqında "Krımskiy veter" telegram kanalı ve "Suspilne Qırım" haber ete. Berilgen malümatqa köre, patlavlardan biri "pencerelerniñ titremesine" sebep olğan. Malümat alına.
Aqyarnıñ işğal yolbaşçısı Mihail Razvojayev patlav aqqında haberlerden birden soñra telegram kanalında şeerde ava telükesini ilân etti. Şerde cemaat naqliyatınıñ işi de toqtatıldı.
Saba Qırım.Aqiqat mühbiri Aqyarda reaktiv bombaatqıçlarnıñ uçurtılmasına beñzegen küçlü sesler aqqında haber etken edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
