Noyabrniñ 22-nde aqşam Aqyarda patlav sesleri eşitildi, dep haber etti Qırım.Aqiqat mühbiri.
Patlav sesleri yerli vaqıtnen saat 18:59-da şeyorniñ merkezinde eşitilgen.
Saat 19:22-de Aqyarnıñ merkeziy qısmında 15 saniye devam etken atış sesleri de eşitilgen.
Yerli telegram kanalları da Aqyarda patlav sesleri eşitilgeni aqqında bildirdiler. Olarnıñ malümatına köre bu ava mudafaası sisteması çalışqan.
Aqyarnıñ Rusiye yolbaşçısı Mihail Razvojayev şimdilik vaziyetni daa izaatlamadı.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayına uçucısızlarına» atış ve «ava mudafaa sistemalarınıñ işi» aqqında ayta.
Avgustnıñ 16-nda Canköy rayonındaki silâ anbarlarında patlavlar oldı. Rusiye Mudafaa nazirligi buña «diversiya» dep ayttı.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayına arbiyleriniñ raketa darbelerini tanıdı. Ukrayına mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayına memurınıñ malümatına esaslanıp, Qırımdaki patlavlar «elit Ukrayına arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
