Aqyarnıñ merkeziy qısmında yerli vaqıtnen saba saat dörtlerde patlavğa ya da basıq top davuşına beñzegen küçlü patlav sesi eşitildi, dep haber ete Qırım.Aqiqat mühbiri.
Bundan ğayrı ''Krımskiy veter" telegram kanalı yerli sakinlerge atfı etip, patlavğa beñzegen ses Lukomskaya soqağı civarında ve Kamışova ve Balıqlava körfezlerinde eşitilgenini bildire.
Rusiyeniñ nezareti astında olğan Aqyarnıñ yolbaşçısı Mihail Razvojayev öz telegram kanalında Rusiye ava ücüminden mudafaa sisteması "pilotsız uçqan cihaznı urıp tüşürgenini" bildirdi.
"Bugün saba Balıqlava issilik elektrostantsiyası civarında ava mudafaası sisteması pilotsız uçqan cihaz urıp tüşürdi. İssilik elektrostantsiyası zarar körmedi", - dep yazdı o.
Keçenlerde Qırım.Aqiqat mühbirleri yerli saatnen saba 5-lerde (Kyivde saba saat dörtlerde) Rusiye arbiy bölükleri olğan rayonlarda bir qaç patlav eşitildi, dep bildirdi. Aqyarnıñ merkezinde saat 05:14-te raketa sesi ve küçlü bir patlav eşitildi, camlar tasırlap başladı. Eñ küçlü patlav saba 6:15-te oldı.
Bendan soñ, Rusiye kontrolindeki Aqyar yolbaşçısı Mihail Razvojayev «ukruçucısızlarınıñ» ücümi aqqında bildirip, Aqyarda saba olğan patlavlarnı izaatladı. Onıñ aytqanına köre, Rusiyeniñ ava mudafaa sistemasınıñ quvetleri «ücümni urıp qaytarmağa devam ete».
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
