Aqyarnıñ merkeziy qısmında oktâbrniñ 18-nde saat 17:34-te patlav eşitildi, 2 daqqadan soñ ava telükesi signalı çalıp başladı, dep haber ete Qırım.Aqiqat mühbiri.
Ava telükesi aqqında şeerniñ Rusiye yolbaşçısı Mihail Razvojayev de tenbiledi, lâkin patlav aqqında aytmadı. Aynı vaqıtta Rusiye ve Qırım Telegram kanalları patlav Saharnaya Golovka qasabası civarında oldı, foto ve videolarnı derc etti. Bu malümatnıñ doğru olıp-olmağanını isbatlamaq şimdilik imkânsız ola.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
