Aprelniñ 29-na keçken gecesi Aqyarnıñ Kazaçya körfezinde neft bazası yanmağa başlağan. Bunı Qırım.Aqiqat mühbiri haber ete.
Onıñ sözlerine köre, yanğın küçlüdir, tuman yalıñız saba saatlarında qısmen dağıla başlağan. Gece saat ekilerde şu rayonda atış sesleri de eşitilgen.
Şeerniñ işğal yolbaşçısı Mihail Razvojayev yaqıt rezervuarları yanğanını bildirdi.
"Bütün kerekli hususiy hızmet organları qaza yerinde çalışalar. Yanğın meydanı 1000 kvadrat metr, yanğın dertünci sınıf [telüke] olaraq sayıla", - dep yazdı o.
Telegram kanalları tarafından yayınlanğan videolarğa köre, tütün sunutı bir qaç kilometr uzaqlıqtan korbne, onıñ üstündeki kök ise qararğan.
Razvojayev, yerli sakinlerge iç bir şey tehdit etmegenini, yanğın neticesinde kimse zarar körmegenini bildirdi.
Şeerniñ işğal yolbaşçısı yanğınnıñ şeerniñ yaqıt teminatına tesir etmecegine söz berdi, onıñ sözlerine köre, yanğın neticesinde yoq etilgen yedekler yaqıt qoyuv stantsiyalarını yaqıtnen temin etmek içün qullanıla edi.
Aprelniñ 24-ne keçken gecesi, saat 3:30-larda, Aqyarda eki patlav oldı, dep haber etken ediler Qırım.Aqiqat mühbirleri. Patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitilgen edi. Zenit topu ve atıcı silâ ateşleri de eşitilgen edi.
Soñra malümatnı şeerniñ Rusiye yolbaşçısı Mihail Razvojayev tasdıqlağan edi. Onıñ aytqanına köre, gece Aqyarğa suv üstü dronlar ücüm etken – bir uçucısız yoq etilgen, ekincisi özü patlağan.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
