Aqyar mekteplerinde balalarnı mayıs 9 kününe Rusiye arbiyleri içün varaqalar yazmağa mecbur eteler, dep bildire "Sarı şerit" areketi.
Qayd etilgenine köre, bu talap ana-babalarnıñ bir qısmında narazılıqnı doğurdı, balalarnı evde "hastalıq" ya da "aile vaziyetleri" sebebinden qaldıralar.
Faallerniñ aytqanına köre, quralaynıñ 5-nden başlap, mektep talebelerini ana-babalarınıñ izni olmadan derslerden çıqarıp, olarğa sovet urbasını kiydire ve mayusnıñ 9-na bağışlanğan süjetlerniñ çıqarılmasında iştirak etmege mecbur eteler.
"Ocalar ve memuriyet hadimleri balalarğa ana-babalarına mektepte neler olğanını aytmağa yasaq etkenleri qayd etildi", — dep bildire areket.
Bundan evel "Sarı şerit" Aqyarda talebelerniñ kelecekte oquğan aliy oquv yurtlarını saylamaq içün onlayn-formlarnı toldurmaq kerek olğanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
