Aqyarda Medeniyet eviniñ ziyaretçilerini ava telükesi signalı vaqtında sığınaqqa yibermegenler. Bunıñ aqqında yerli telegram kanalları haber ete.
"Çp/Krım" telegram kanalı özüni yañğın telükesizligi hadimi kibi taqdim etken şahısnıñ Balıqçılar medeniyet eviniñ ziyaretçilerine binanadaki sığınaqnı qullanmağa izin bermegenini körmk mümkün olğan bir videonı yayınladı. Videoda erkek "sığınaq tek hadimler içündir" aytqanını eşitmek mümkün. Medeniyet eviniñ ziyaretçileri arasında qadınlar ve balalar da bar edi.
Razvojayev vaziyetke "qaradan tış sersemlik ya da aselet ziyankârlıq" dedi ve "bunen sert şekilde oğraşacağını" ayttı.
Sentâbrniñ 22-nde kündüz işğal etilgen Aqyarda bir qaç patlav aqqında belli oldı. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına qarşı raketa darbesi aqqında bildirdi.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketanı urıp tüşürdi, dep bildirdi. Lâkin uydu fotoresimleri ve videolarda bir qaç raketa nişanını urdı. Aynı vaqıtta içtimaiy ağlarda darbe neticesinde altı yaralanğan kişi bar, dep yaza. Rusiye Qara deñiz flotunıñ ştab zararları aqqında malümatnı mestaqil menbalarda tasdıqlamaq imkân yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
