Aqyarnıñ Pobedı caddesinde ev ögündeki turaqlardan birinde maşinalarnen beraber topraq omradı. Bu aqta şaatlar içtimaiy ağlarda ve yerli kütleviy haber vastaları haber ete.
Derc etilgen video ve fotolarda körüngeni kibi, qaza neticesinde bir maşina uçurımda asılıp qaldı ve daa üçü tüşti. Olardan bir danesi ise avdarıldı.
Qırımnıñ Rusiye akimiyetine yaqın olğan «Krıminform» saytınıñ malümatına köre, Fevqulâde vaziyetler nazirligi ve Aqyarnıñ Rusiye ükümeti hadimleri omrav sebeplerini ögrene. Adise neticesinde kimse yaralanmadı.
«Yaralanğanlar yoq, kimse zarar körmedi. Telükeden mesüliyetli olğan Fevqulâde vaziyetler nazirliginiñ ve Aqyar ükümetiniñ vekilleri anda buluna. İşçi gruppa adise tafsilâtlarını ögrene ve aqibetlerini yoq etmek içün tedbir ala», – dep bildire matbuat hızmeti. Onıñ malümatına köre, adise yerinden naqliyat vastaları tahliye etile.
Aqyardaki Rusiye Fevqulâde vaziyetler nazirligi idaresiniñ matbuat hızmeti bildirgenine köre, adise aqqında saba saat 7:55-te haber etildi, anda qurtarıcılar yollandı. Olar eki maşinanı tahliye etti. Daa soñra manipulâtor yardımınen üçünci maşina tahliye etildi. Omravğa tüşken daa üç maşinanı tahliye etmek içün azırlıq yapıla.
