Keçken künü Aqyarda 19 yañı COVID-19 hastası qayd etildi, dep bildirdi şeerniñ Rusiye ükümetiniñ matbuat hızmeti.
Berilgen malümatqa köre üç insan ölgen, 17 hasta tedaviylengen soñ hastahaneden çıqarılğan.
Umumen Aqyarda 14148 insan yañı koronavirus yuqunçına oğradı. Al-azırda 12977 kişi tüzeldi, 633 insan vefat etti.
Mayısnıñ 2-nde Aqyarda 2o hasta qayd etildi.
Kreml kontrolindeki Aqyar yolbaşçısı Mihail Razvojayev koronavirus pandemiyasınen bağlı yüksek seviyeli azırlıq rejimini 2021 senesi mayısnıñ 31-ne qadar uzattı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
