Aqyarda Armannıñ 13-nde kündüz üçünci ava telükesi ilân etildi, dep bildire şeerniñ rusiyeli başı Mihail Razvojayev içtimaiy ağlardaki saifelerinde.
Ava telükesi saat 14:04-te ilân etildi. Bir saat soñra Razvojayev RF ava mudafaası Fiolent, Şimaliy taraf ve Balıqlava rayonında 10 dronnı urıp tüşürgenini bildirdi.
Ukrayina arbiyleri vaziyetni şimdilik izaatlamay.
Daa evel haber etilgenine köre, Armannıñ 12-nde aqşam Aqyarda ava telükesi ilân etilgen edi, bundan soñ şeerde patlavlar oldı ve elektrik teminlevi yoq oldı.
"Krımskiy vetr" telegram kanalınıñ malümatına köre, Rusiye ava mudafaasınıñ işi sebebinden Balaklavskaya yaqarlıq stansiyasınıñ yanında uçaq ya da raketanıñ parçaları arabağa tüşken, bu da içinde olğan insanlarnıñ ölümine ketirgen.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.