Noyabrniñ 17-nde saba 54 yañı COVID-19 hastası qayd etildi. 65 yaşındaki bir qadın ölgen, dep bildirdi Aqyarnıñ Rusiye ükümeti.
"Olardan 24 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna. Hastalar – 2 yaşından 91 yaşına qadar yerli sakinler. 143 kişi tedaviylengen soñ hastahaneden çıqarıldı”, – dep yazıla ükümetniñ malümatında.
Aqyarnıñ işğalci başlıqlarınıñ malümatına köre, şeerde yılnıñ başından 3579 adam yañı koronavirus yuqunçına oğrağan, 2773 tedaviylengen, 96 ölgen.
"Bugünki künde COVID-19 diagnozı tasdıqlanğan 305 kişi hastahanede buluna: 143 – yuqunç hastahanesinde, 159 – doquzıncı şeer hastahanesinde, üçü Mudafaa nazirliginiñ hastahanesinde. 58 adam "İzumrudda" yata. 379 insan ambulator tedaviylevde buluna, 618 kişi közetile", – dep qoştılar ükümette.
Tünevin Qırımda 155 yañı koronavirus hastası qayd etilgen edi. Pandemiya başlağanından episi olıp 12522 Covid-19 hastası qayd etilgen, 8080 tedaviylengen soñ hastahaneden çıqarılğan, 218 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
