Aqyarda COVID-19 ile hasta pensioner vefat etti. Bunı şeerniñ rusiyeli akimiyetinde haber ettiler. Olarnıñ malümatına köre, aqay 78 yaşında edi.
"Dignoz, adam daa sag olğanda tasdıqlandı. Hastalıq eki taraflı pnevmoniya ve aqciger şişikliginen ağırlaştı. Ağırlaşuvlar ölümge sebep oldı", - denile beyanatta.
Em de akimiyet, tünevin şeerde iç bir yañı COVID-19 hastası qayd etilmegenini bildirdi.
Şimdilik hastahanelerde 41 adam bar. 295 adam yahşı oldı, 10 adam vegfat etti. İnfektsiya hastahanesinde 169 adam baqıla, 9-ıncı şeer hastahanesinde - 121 adam nezaret altında buluna. Yaşağan yerlerinde 301 adam baqıla.
Umumen, akimiyetniñ malümatına köre, Aqyarda - 339 COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
