Rusiye nezaretindeki Aqyar ükümetinde, şeerde koronavirus diagnozı tasdıqlanğan turist qadınnıñ qıdıruvları devam etkenini bildire.
"Daa bir qadınnı küç orğanları qıdıra - o şeerge başqa bölgeden keldi ve ileride müsbet netice köstergen koronavirus testini yaptı. Telefonğa cevap bermey, vesiqalarda belgilengen adres boyunca yaşamay", - denile şeer akimiyetiniñ beyanatında.
Müsbet COVID-19 testi ile qadınnıñ qıdıruvları içün daa avgustnıñ 26-sında bildirile edi.
Aqyarda tünevin 15 yañı koronavirus adisesi qayd etildi.
Yılnıñ başından berli Aqyarda yañı koronavirus infektsiyasınen 488 adam hastalandı, 386 adam yahşı oldı, 18 adam öldi.
Qırımda tünevin koronavirustan eki adam elâk oldı.
Qırımda tünevin pandemiya zamanında bir künde eñ çoq koronavirus hastası qayd etildi - 84 kişi.
Akimiyetniñ malümatına köre, umumen Qırımda 2271 yañı koronavirus hastası qayd etildi. 89-ı çetelden keldi, 122-si qomşu Rusiyeden kelgenler ve olarnen alâqada olğanlar, 1580 adam yahşı oldı. Aqyarda koronavirusnen 573 adam hastalandı, 378 adam yahşı oldı, 18 adam vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
