Aqyarda General Petrov ve Novorossiyskaya soqaqlarınıñ kesişüvinde kimligi belli olmağan insanlar yerli KPRF firqasınıñ ofisi yanında yerleştirilgen sovet diktatorı İosif Stalinniñ resimi ile plakatnı kesti.
Bu aqta Aqyar sakini Roman Çernenko Facebookta bildirdi.
Qırımdaki Rusiye uquq qoruyıcıları ve Rusiye Federatsiyasınıñ Kommunist Firqası şimdilik cevap bermedi.
Kommunistler şeerniñ merkezinde bannerni qoydı, anda sovet diktatorı Stalin Aqyar yolbaşçısınıñ Rusiye saylavlarında «doğru rey bermege» çağıra.
Hatırlatamız, 2020 senesi iyün ayında Aqyar merkezinde «halq duşmanları» aqqında Stalinniñ süreti peyda oldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
