Aqyarda yanvarnıñ 19 sabası itibarınen 100 yañı koronavirus hastası qayd etildi. 47 yaştan 93 yaşqa qadar beş kişi öldi.
“Pandemiya başlağanından berli Aqyarda koronavirusnen episi olıp 8516 kişi hastalândı, 7 698 tedaviylendi ve 329 öldi. Bugünde, COVID-19 diagnozı tasdıqlanğan 300 insan hastahanelerde yata, alı yengil hastalar bölüginde 195 kişi buluna” – dep bildirdi işğal etilgen Aqyarnıñ Rusiye ükümetiniñ matbuat hızmeti.
Qayd etilgenine köre, 663 kişi közetile eken.
Yanvarnıñ 18-nde Aqyarda 95 yañı koronavirus hastası qayd etildi, 40 kişi tedaviylengen soñ hastahaneden çıqarılğan.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
