Yanvarniñ 8-nde saba Aqyarda 92 yañı COVID-19 hastası qayd etildi. 61 yaştan 87 yaşqa qadar altı insan vefat etti, dep bildirdi şeerniñ Rusiye ükümeti.
«Yahşı olğan 33 insan hastahaneden çıqarıldı. Umumen Aqyarda 7467 kişi yañı koronavirus yuqunçına oğradı. Bugünge qadar 6826 insan tüzeldi, 270 kişi vefat etti», – dep aytıla haberde.
Şeer akimiyetiniñ malümatına köre, COVID-19 tasdıqlanğan 220 kişi hastahanelerde buluna. Alı yengil hastalar bölüginde 238 kişi yata.
575 insan közetile.
Qırımda pandemiya vaqtında 27164 COVID-19 hastası qayd etildi. Tüzelgen 21354 kişi hastahaneden yiberildi, 574 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
