İyünniñ 8-nde saba Aqyarda bir koronavirus hastası qayd etildi, dep haber ete şeerniñ Rusiye ükümetiniñ matbuat hızmeti.
Qayd etilgenine köre, daa evel diagnozı tasdıqlanğan yedi aylıq qızçıqnıñ anası da hasta. Ekisi de yuqunç hastahanesinde bulunalar.
Aqyarda 177 insan koronavirus yuqunçına oğradı.
145 insan tüzeldi, üç kişi vefat etti. 97 kişi yuqunç astahanesinde közetile, №9 şeer hastahanesinde 92 insan qala. 1176 insan yaşağan yerinde közetile.
Hatırlatamız, Qırımda iyünniñ 7-nde sekiz yañı koronavirus hastası qayd etildi. İyünniñ 8-i sabasına qadar Qırımda 446 koronavirus hastası qayd etildi. 317 insan tüzelip yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
