Aprelniñ 9-na keçer gecesi Aqyarda bir qaç küçlü patlav eşitildi, dep bildirdi yerli Telegram kanalları.
Bir qaç saife Rusiye Federatsiyası ava mudafaa sistemasınıñ işi aqqında yazdı. Rusiye kontrolindeki Aqyar yolbaşçısı şeerde küçlü patlav seslerini izaatlap, «Aqyar civarında deñiz üzerinde alçaq uçqan nişannıñ yoq etilüvinen bağlı sistema çalıştı», dep bildirdi. Angi nişan aqqında aytıla Razvojayev bildirmedi.
Rusiye Mudafaa nazirligi Qara deñizde «Neptun» gemilerge qarşı Ukrayına raketası urıp tüşürildi, dep bildire.
Ukrayına arbiyleri bu malümatnı izaatlamadı. Rusiye Mudafaa nazirliginiñ malümatını teşkermek imkânsız ola.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
