Aqyarda Orta küzniñ 6-nda aqşam ve 7-nde gece eki kere ava telükesi ilân etildi, dep bildire Rusiye kontrolindeki şeer yolbaşçısı Mihail Razvojayev içtimaiy ağlardaki saifesinde.
Yerli sakinler içtimaiy ağlarda şeerde ava mudafaasınıñ çalışqanını bildirdiler. Hususan, "Krımskiy veter" telegram kanalı abunecilerine atıf eterek, Aqyar civarındaki Andreyevka üzerinde ZRPK işi ve Rusiyeniñ "Kaça" ve "Belbek" arbiy uçaq alanları civarında patlav sesleri aqqında haber etti.
Bundan ğayrı, Rusiye Fevqulâde vaziyetler nazirliginiñ idaresi Qırımda uçucısız havf ve Rusiye ava mudafaasınıñ işi aqqında bildirgen edi. "Krımskiy veter" yazğanına köre, yerli sakinler İslâm Terek, İçki ve Krasnoperekopsk rayonlarında patlavlar, dronlarnıñ uçması ve ateş açılması aqqında bildireler.
Bu malümatnıñ teşkerilmesi kerek. Rusiye akimiyeti ücümniñ aqibetleri aqqında haber etmedi, Ukrayin arbiyleri vaziyetni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.