Aqyarnıñ Rusiye akimiyeti yerli ekimlerge koronavirus ile küreş içün mukâfat berecek, dep vade ete. Bu aqta Moskva kontrolindeki şeer ükümetiniñ matbuat hızmeti bildirdi.
«Keçken aftanıñ soñunda tibbiyet hadimlerini mukâfatlandırmaq içün federal para ketirildi. Öz tarafımdan, koronavirus yuqunçına qarşı çalışqanlarnı mukâfatlandırmaq içün Aqyar bücetinden de bermege vazife bergen edim. Bu afta bütün paralar berilmeli», – dep ayttı Kreml kontrolindeki Aqyar yolbaşçısı vazifelerini eda etken Mihail Razvojayev.
Qırımda tibbiyet hadimlerine cemaat naqliyatından bedava faydalanmağa izin berildi.
Bundan evel Aqyar sakinlerine acele bir şey olmağanda evden çıqmağa yasaq etildi. Aqyarda yahta ve katerlernen deñiz kezintileri de yasaqlandı, şeer kirişlerinde blokpostlar qoyuldı. Şeer akimiyeti, aprelniñ 2-nden itibaren şeerde özüni tecrit etüv rejimini bozğanlarğa ceza berilecek, dep ilân etti.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
