Rusiye kontrolindeki Aqyar şeer yolbaşçısı vazifelerini eda etken Mihail Razvojayev Aqyarda eki yañı koronavirus hastası qayd etildi, dep bildire.
«Raatlıq künleri eki tasdıqlanğan hasta bar. Anası çetelden qaytqan ve hastahanemizde közetüv altında bulunğan qadınıñ küçük qızı. Küçük qızı, on dört aylıq, hastalandı, diagnozı tasdıqlandı», – dep bildire Razvojayevniñ aytqanlarını «RİA Novosti-Krım».
Onıñ aytqanına köre, şimdi qızçıqnıñ alı bir qarar.
Razvojayevniñ bildirgenine köre, ekinci hasta Daşa Sevastopolskaya hastahanesinde bulunğan er adamdır.
«Daşa Sevastopolskaya hastahanemizde yattı – tedaviylengen tserebral paraliç oğlançığını baqtı», – dep bildire Razvojayevniñ aytqanlarını «Novıy Sevastopol» neşiri.
Aqyar Rusiye akimiyetiniñ resmiy saytlarında yañı koronavirus hastaları aqqında malümat daa yoq.
Qırımnıñ Rusiye yolbaşçısı Sergey Aksenovnıñ aprelniñ 20-nde bildirgenine köre, Qırımda yañı hastalar qayd etilmedi.
Böylece, Qırımda 45 insan COVID-19 hastalığına oğradı, 18 kişi Aqyarda hastalandı.
Qırım ve Aqyarda koronavirustan izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
