Aqyarda mayıs 16-sından berli birinci sefer yañı koronavirus hastası qayd etilmedi. Bunı şeerniñ rusiyeli ükümeti bildire.
Akimiyetniñ malümatına köre, tünevin bir adam yahşı olıp hastahaneden çıqtı.
Umumen yılnıñ başından berli Aqyarda 161 adam koronavirusnen hastalandı. 125 adam yahşı oldı, 3 adam keçindi.
Rusiyeli şeer ükümetiniñ beyanatında bildirilgeni kibi, bügünde-bugün infektsiya hastahanesinde 83 adam, 9-ıncı şeer hastahanesinde 85 adam nezaret altında buluna. Yaşağan yerlerinde 702 adam közetile.
Tünevin Qırım observatorlarına çeşit-türlü keçit noqtalarından kelgen 30-dan ziyade adam qoyuldı.
Şimdilik Qırımda 369 yañı koronavirus hastası qayd etildi. 27-si çetelden keldi, 74 kişi qomşu Rusiyeden keldi. 11 insan vefat etti. Aqyarda 161 COVID-19 hastası bar, üç kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
