İşğal etilgen Aqyarda dört yañı koronavirus hastası qayd etildi.
Hastalardan biri – ana-babasından hastalanğan yedi yaşında bala. Bu aqta şeerniñ Rusiye ükümetiniñ matbuat hızmeti bildire.
«Mayısnıñ 20-si sabasına daa 18 kişi tüzelip hastahaneden çıqarıldı. Dört COVID-19 hastası qayd etildi, episi hastalarnen alâqada olğan edi. Yedi yaşında hastanıñ diagnozı tasdıqlandı… Bugünki künde 86 insan yuqunç hastahanesinde qala, 68 kişi №9 şeer hastahanesinde qala. 705 insan yaşağan yerinde közetile», – dep aytıla haberde.
Böylece, Rusiye akimiyetiniñ malümatına köre, yılnıñ başından Aqyarda 147 koronavirus hastası qayd etildi. 101 insan tüzeldi, 2 kişi vefat etti.
Mayısnıñ 20-nde saba Qırımda bir koronavirus hastası aqqında haber etildi. Bugünge qadar 299 koronavirus hastası qayd etildi. 25-i çetelden keldi, 31-i – Rusiyeden. 122 insan tüzeldi, 9 insan vefat etti. Umumen yılnıñ başından berli Aqyarda 143 kişi koronavirus yuqunçına oğradı, eki insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
