Aqyar memurı Vadim Kirpiçnikov, Aqyarda dollar fiyatı ve inflâtsiyadan sebep erzaq malları paalılaşqanını ayta. Bunı şeer ükümetiniñ matbuat hızmeti bildire.
"Fiyatlarnıñ artması inflâtsiyanen bağlı, çünki mallarnıñ çoqusında dollar qısımları bar. İlk nevbette kerek olğan mahsulatnıñ keskin fiyat artuvı yoq", - dedi Kirpiçnikov.
Amma memur, "iç bir türlü mahsulatnıñ qıtlığı olmağanını" qoşa.
Qırımda özüni izolâtsiya etüvi rejimi aprelniñ 30-ınace uzatıldı, Aqyarda ise - aprelniñ 19-ınace.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
