Aqyarda avgustnıñ 27-nde saba daa eki COVID-19 hastası qayd etildi. Diagnoz bir şeer sakini ve kelgen daa bir qadında tasdıqlandı, dep bildire Aqyarnıñ Rusiye ükümeti.
Qayd etilgenine köre, al-azırda 60 insan hastahanelerde buluna. 157 kişi yuqunç hastahanesinde közetile, №9 şeer hastahanesinde 119 kişi yata. 198 insan yaşağan yerinde közetile.
Akimiyetniñ malümatına köre, umumen yılnıñ başından Aqyarda 473 insan koronavirus yuqunçına oğradı, 378 kişi yahşı oldı, 18 kişi vefat etti.
Moskva tarafından tayin etilgen Qırım yolbaşçısı Sergey Aksenov, bir künde Qırımda 56 insan yañı koronavirus yuqunçına oğradı, dep bildirdi.
Akimiyetniñ malümatına köre, umumen Qırımda 2187 yañı koronavirus hastası qayd etildi. 88-i çetelden keldi, 121-i qomşu Rusiyeden kelgenler ve olarnen alâqada olğanlar, 1650 hasta tibbiy yardım içün muracaat etkende belli oldı ve qayd etilgen hastalarnen alâqada oldı, 328 hasta sağlam insanlarnıñ skriningi neticesinde belli oldı.
