Aqyarda dekabrniñ 24 sabası itibarınen 81 yañı COVID-19 hastası qayd etildi. Hastalar – 5 yaştan 86 yaşqa qadar insanlar. 130 adam tüzelgen soñ hastahaneden çıqarıldı. 57-75 yaşlarındaki dört hasta öldi.Bu aqta şeerniñ Rusiye ükümeti zaber etti.
“Umumen yılnıñ başından Aqyarda 6175 insan yañı koronavirus yuqunçına oğradı. 5797insan tedaviylendi, 211 öldi. 155 hasta statsionarlarda, 178 ambulator tedaviylevde” – dep yazıla haberde.
560 nezaret astında buluna – bular daa evel qayd etilgen hastalarnen alâqada olğanlar, olarda koronavirus diagnozı tasdıqlanmadı.
Yerli akimiyetniñ malümatına köre pandemiya vaqtında koronavirusqa 22818 adam oğrağan, tedaviylengen soñ 17360 hastahaneden çıqarılğan,451 ölgen.
Rospotrebnadzor Qırımda COVID-19, gripp ve keskin nefes virus yuqunçı (KNVY) hastalarınıñ sayısı artqanını bildire. Eñ çoq koronavirus hastası Yalta, Aluşta ve Aqmescitte.
Prezident Vladimir Putinniñ avalesinen Rusiye Mudafaa nazirligi Yalta ve Aqmescitte koronavirus gospitalerini yerleştirecek.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
