Aqyarda iyünniñ 24-nde saba daa bir COVID-19 hastası qayd etildi. Hasta daa evel hastalanğan kişinen alâqada olğan edi, dep bildire Aqyarnıñ Rusiye ükümeti.
Akimiyetniñ malümatına köre, yuqunç hastahanesinde 105 kişi közetile, №9 şeer hastahanesinde 64 insan buluna. 952 insan yaşağan yerinde közetile.
İyünniñ 23-nde keçiş noqtalarında ve tren vokzalında 516 insannıñ testi yapıldı. «İzumrud» pansionatı observator rejiminde çalışa.
Yılnıñ başından Aqyarda 215 insan yañı koronavirus yuqunçına oğradı. 170 kişi yahşı oldı, üç kişi vefat etti.
Kreml kontrolindeki Qırım yolbaşçısı Sergey Aksenovnıñ bildirgenine köre, keçken künü 8 yañı koronavirus hastası qayd etildi. Umumen 631 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
