Aqyarda daa bir koronavirus hastası qayd etildi. Diagnoz daa evel hastalanğan ve yuqunç hastahanesinde bulunğan insannıñ qızında tasdıqlandı, dep haber ete şeerniñ Rusiye ükümeti.
«Yuqunç hastahanesi, şeerniñ №9 hastahanesinde ve Omega körfezindeki Rusiye Mudafaa nazirliginiñ gospitalinde aprelniñ 30-nda saba diagnozı tasdıqlanğan 68 insan buluna, olar kerekli tibbiy yardım ala», – dep aytıla haberde.
Şeerniñ Rusiye ükümeti malümatına köre, yuqunç hastahanesinde 145 insan közetüv altında buluna, №9 şeer hastahanesinde – 59 insan.
1083 kişi yaşağan yerinde közetüv altında buluna.
«İzumrud» pansionatı, Rusiye Mudafaa nazirliginiñ Omega körfezindeki ve Belbekteki qurucılıq meydançıqları observator olaraq çalışa. «İzumrud» pansionatında 77 insan buluna, 704 kişi qurucılıq meydançıqlarında observatsiyada buluna.
Qırımda aprelniñ 30-nda üç yañı COVID-19 hastası bar, aralarında ağırayaqlı qadın bar.
Rusiye akimiyetiniñ malümatına köre, Aqyarda 78 kişi koronavirusnen hastalandı, Qırımda – 92 insan.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
