Aqyarda daa altı yañı COVID-19 hastası qayd etildi. Bu aqta Qırım ve Aqyar kütleviy haber vastaları Aqyar şeer yolbaşçısı vazifelerini vaqtınca eda etken Mihail Razvojayevniñ malümatına esaslanıp bildire.
«Diagnozı tasdıqlanğan 25 insan bar. Altısı da bugün tasdıqlanğan – Daşa Sevastopolskaya hastahanesiniñ hastaları, olar hastahanede közetüv altında buluna ediler. Şimdi testleri tasdıqlandı», – dep bildirdi Razvojayev.
Aqyar ükümetiniñ yolbaşçısı daa bir koronavirus hastası aqqında bildirgen edi. Hasta «İzumrud» observatorında edi, andan yuqunç hastahanesine avuştırıldı.
Böylece, Qırımda tasdıqlanğan 51 COVID-19 hastası bar. Aqyarda 19 koronavirus hastası qayd etildi.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
