Aqyarda yanvarniñ 27-nde saba 96 yañı COVID-19 hastası qayd etildi. Tüzelgen 89 kişi yiberildi, 51 yaştan 92 yaşqa qadar beş insan vefat etti, dep bildire şeerniñ Rusiye ükümetiniñ matbuat hızmeti.
«Umumen Aqyarda 9303 kişi yañı koronavirus yuqunçına oğradı. Al-azırda 8400 kişi tüzeldi, 376 insan vefat etti. COVID-19 tasdıqlanğan 337 kişi hastahanelerde buluna. Alı ağır olmağan hastalar bölüginde 113 kişi buluna», – dep aytıla haberde.
Akimiyetniñ malümatına köre, 660 kişi közetile, 1742 insanğa COVID-19 aşısı yapıldı. 628 kişi ekinci kere aşı oldı.
Qırımda keçken künü 181 koronavirus hastası qayd etildi, 9 hasta vefat etti, pandemiya vaqtında 729 kişi vefat etti, dep bildire Qırımnıñ Sağlıq nazirligi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
