Keçken künü Aqyarda 89 yañı COVID-19 hastası qayd etildi, 52 yaştan 82 yaşqa qadar dört hasta vefat etti, dep bildire Rusiye kontrolindeki şeer ükümetiniñ matbuat hızmeti.
Qayd etilgenine köre, tüzelgen 90 insan yiberildi.
«Umumen Aqyarda 10654 insan yañı koronavirus yuqunçına oğradı. 9503 kişi tüzeldi, 429 insan vefat etti», – dep aytıla haberde.
Akimiyetniñ malümatına köre, COVID-19 tasdıqlanğan 344 insan hastahanelerde buluna.
«Alı yengil hastalar bölüginde 60 insan yata. Yerlerniñ 49%-ı tolu. 735 kişi közetile», – dep qoştı matbuat hızmeti.
Aqyar akimiyeti, şeer ealisi kütleviy şekilde aşılana, 5 biñ kişi aşı olmaq içün yazıldı, dep haber etken edi.
Fevral ayında Aqyar akimiyeti 18 biñ koronavirus aşısını almağa planlaştıra. Aqyarnıñ sağlıq departamenti müdiri Vitaliy Denisovnıñ malümatına köre, şeerge 1742 aşı keldi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
