Aqyarda dekabrniñ 21-nde saba 83 yañı COVID-19 hastası qayd etildi, 56 yaştan 75 yaşqa qadar dört kişi vefat etti, dep haber ete şeerniñ Rusiye ükümeti.
Akimiyetniñ malümatına köre, hastalar – bir yaştan 92 yaşqa qadar insanlar. Üç kişi tüzelip yiberildi.
«Yılnıñ başından Aqyarda 5929 insan yañı koronavirus yuqunçına oğradı. 5442 kişi tüzeldi, 200 insan vefat etti. Bugünki künde 217 insan hastahanede buluna, yengil hastalar içün bölükte 190 kişi yata. 58 insan ambulator tedaviylevde buluna», – dep aytıla haberde.
Müessise qayd etkenine köre, 558 insan közetile – bu insanlar hastalarnen alâqada oldı, amma COVID-19 diagnozı tasdıqlanmadı.
Qırımda pandemiya vaqtında, akimiyetniñ malümatına köre, 21756 COVID-19 hastası qayd etildi, 16410 hasta tüzelip yiberildi, 438 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
