Aqyarda dekabrniñ 23-nde saba 83 COVID-19 hastası qayd etildi, tüzelgen 110 kişi yiberildi, bir künde beş insan vefat etti, dep haber ete şeerniñ Rusiye ükümeti.
Qayd etilgenine köre, hastalar – bir yaştan 83 yaşqa qadar insanlar, vefat etkenler – 63 yaştan 90 yaşqa qadar hastalar.
«Umumen yılnıñ başından Aqyarda 6093 insan yañı koronavirus yuqunçına oğradı. 5667 insan tüzeldi, 207 kişi vefat etti. Bugünki künde 189 insan hastahanede buluna, 182 kişi yengil hastalar bölüginde yata. 19 kişi ambulator tedaviylevde buluna», – dep aytıla haberde.
Akimiyetniñ malümatına köre, 548 insan közetile.
Umumen pandemiya vaqtında Qırımda 22463 insan hastalandı, tüzelgen 16938 kişi çıqarıldı, 444 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
