Fevralnıñ 27-nde Aqyarda 62 yañı koronavirus hastası qayd etilgen. Bu aqta Rusiye nezaretinde olğan şeer memuriyetiniñ matbuat hızmeti haber ete.
"109 kişi tedaviylengen soñ hasrahaneden çıqarıldı. Aynı zamanda 82 yaştan 93 yaşqa qadar dört hasta öldi", – dep yazıla bildirmede.
Berilgen malümatqa köre, pandemiya başlağanından berli Aqyarda 11 891 kişi hastalandı. Şimidiki vaqıtta 10 819 hasta tedaviylendi ve 490 öldi, 596 kişi közetile.
Qırımda keçken künü 63 yañı koronavirus hastası qayd etildi, aynı zamanda 8-niñ hastalıq alâmetleri yoq edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
