Noyabrniñ 25-nde saba Aqyarda 57 yañı COVID-19 hastası qayd etildi. Beşi yuqunç ve doquzıncı şeer hastahanelerine alındı, qalğanları ambulator tedaviylevde buluna, dep bildire şeerniñ Rusiye ükümeti.
«Hastalar – üç yaşından 82 yaşına qadar yerli sakinler. 95 insan tüzelgen soñ yiberildi. Üç kişi vefat etti: 69 yaşında er adamı ve 85 yaşında qadın», – dep aytıla haberde.
Müessise malümatına köre, yılnıñ başından Aqyarda 4037 insan yañı koronavirus yuqunçına oğradı. 3470 kişi tüzeldi, 109 insan vefat etti.
Bugünki künde COVID-19 diagnozı tasdıqlanğan 205 kişi Aqyar hastahanelerinde yata, 227 kişi ambulator tedaviylevde buluna, 604 insan közetile, dep bildire şeerniñ ükümeti.
Keçken künü Qırımda 225 koronavirus hastası qayd etildi. Qırımda pandemiya vaqtında 10212 insan tüzeldi. Qırım sağlıq nazirliginiñ malümatına köre, bu yuqunçtan epidemiya vaqtında 252 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
