Aqyarda soñki künde daa 38 COVID-19 hastası yuqunç ve doquzıncı şeer hastahanelerine alındı. Bu aqta şeerniñ Rusiye ükümeti haber ete.
Noyabrniñ 7-nde saba 81 COVID-19 yañı hastası qayd etildi. Hastalar – üç yaşından 78 yaşına qadar yerli sakinler. 39 insan tüzelgen soñ hastahaneden çıqarıldı. 73 yaşında qadın vefat etti.
Yılnıñ başından Aqyarda 2964 insan yañı koronavirus yuqunçına oğradı. Al-azırda 1955 kişi tüzeldi, 77 insan vefat etti.
313 COVID-19 hastası hastahanede buluna: 170-i – yuqunç hastahanesinde, 141 – doquzıncı şeer hastahanesinde, ekisi Mudafaa nazirliginiñ hastahanesinde. 32 insan «İzumrudda» buluna. 593 kişi ambulator tedaviylevde buluna.
773 insan közetile – bu insanlar hastalarnen alâqada oldı, COVID-19 diagnozı tasdıqlanmadı. «Solnışko» pansionatı observator rejiminde çalışa.
Qırımda noyabrniñ 6-nda 206 koronavirus hastası qayd etildi, 46-sınıñ hastalıq alâmetleri yoq. Bir kün evelsi berilgen malümatqa köre, Aqyarda COVID-19 hastalarınıñ sayısı Qırımdan daa çoq.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
