Martnıñ 12-si sabası itibarınen Aqyarda 37 yañı koronavirus hastası qayd etilgen, 51 yaştan 92 yaşqa qadar üç hasta ölgen, 35 tüzelgen soñ hastahaneden çıqarılğan. Bu aqta Rusiye nezaretinde olğan şeer memuriyetiniñ matbuat hızmeti haber ete.
«Episi olıp, pandemiya başlağandan berli Aqyarda 12 535 kişi hastalandı. Şimidiki vaqıtta 11 620 hasta tedaviylendi ve 529 öldi, 648 kişi közetile», – dep yazıla bildirmede.
Qırımda keçken künü 62 yañı koronavirus hastası qayd etildi, aynı zamanda 4-niñ hastalıq alâmetleri yoq edi. Pandemiya başlanğanından berli Qırımda umumen 36494 COVID-19 hastası qayd etildi, 33295 kişi tedaviylengen soñ yiberildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
