Aprelniñ 15-nde saba Aqyarda 31 yañı COVID-19 hastası qayd etildi, 85 yaşında eki insan vefat etti. Tüzelgen 32 kişi hastahaneden yiberildi, dep bildire şeerniñ Rusiye ükümeti.
«Umumen Aqyarda 13 725 insan yañı koronavirus yuqunçına oğradı. 12 602 kişi tüzeldi, 587 insan vefat etti. 406 kişi közetile – bu insanlar hastalarnen alâqada oldı, amma COVID-19 diagnozı tasdıqlanmadı», – dep bildirdi Aqyarnıñ Rusiye ükümetiniñ matbuat hızmeti.
Qırımda, yerli akimiyetniñ malümatına köre, keçken künü 95 koronavirus hastası qayd etildi, 4 hasta vefat etti, pandemiya vaqtında 144 insan keçindi.
Rospotrebnadzor idaresi Qırımda eki aftadan berli koronavirus hastalarınıñ sayısı eksilmey, dep bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
