Cumaaqşamı künü, iyünniñ 3-nde, Aqyarda 25 yañı COVID-19 hastası qayd etildi, bir insan vefat etti. Bu aqta şeerniñ Rusiye ükümetiniñ matbuat hızmeti bildirdi.
«Tüzelgen 24 insan hastahaneden çıqarıldı. Umumen Aqyarda 15 014 insan yañı koronavirus yuqunçına oğradı. 13 745 kişi tüzeldi, 687 insan vefat etti», – dep aytıla haberde.
Hatırlatamız, Aqyarda iyünniñ 2-nde 31 yañı COVID-19 hastası qayd etildi, 92 yaşında bir insan vefat etti, tüzelgen 21 kişi hastahaneden çıqarıldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
