İyünniñ 20-si sabasına Aqyarda dört yañı COVID-19 hastası qayd etildi, dep haber ete şeerniñ Rusiye ükümetiniñ matbuat hızmeti.
«Hastalar arasında – 14 yaşında çelâbinskli genç. Daa eki hasta özü ekimge muracaat etti, qaydan hastalanğanları ögrenile. Daa bir hasta bundan evel hastalanğan kişinen alâqada olğan edi», – dep bildirile.
Akimiyetniñ malümatına köre, bugünki künde 97 insan yuqunç hastahanesinde közetile, №9 şeer hastahanesinde – 82 kişi. 799 insan yaşağan yerinde közetile.
Yılnıñ başından Aqyarda 200 insan koronavirus yuqunçına oğradı. Al-azırda 25 kişi hastahanede buluna. 165 kişi tüzeldi, 3 insan vefat etti.
Keçken künü Qırımda 5 yañı koronavirus hastası qayd etildi. Umumen al-azırda, Qırım akimiyetiniñ malümatına köre, 595 yañı koronavirus hastası qayd etildi. 36-sı çetelden keldi, 91 kişi qomşu Rusiyeden kelgen ve olarnen alâqada olğanlar. 397 insan yahşı oldı, 20 koronavirus hastası vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
