Aprelniñ 14-nde saba Aqyarda yañı koronavirus hastaları aqqında haber etilmey, dep bildire şeerniñ Rusiye ükümeti. 606 insan ekimlerniñ közetüvi altında buluna.
«Yuqunç hastahanesinde COVID-19 diagnozı tasdıqlanğan üç insan buluna, olar kerekli tibbiy yardım ala. 48 kişi yuqun hastahanesinde közetüv altında buluna. 558 insan yaşağan yerinde közetüv altında qala», – dep aytıla haberde.
Qayd etilgenine köre, observator olaraq çalışqan «İzumrud» pansionatına Daşa Sevastopolskaya hastahanesiniñ hastaları ve hadimleri, dördünci şeer hastahanesiniñ tibbiyet hadimleri ketirildi, Daşa Sevastopolskaya hastahanesinden 25 hasta doquzıncı şeer hastahanesine avuştırıldı.
Aqyarda vatandaşlar özüni izolâtsiya etüv rejimini bozğanları içün 24 protokol tizildi. Rusiye mahkemesi memuriy davalardan biriniñ qararını bu afta çıqarmağa niyetlene.
Aqyarda aprelniñ 13-nde yedi koronavirus hastası qayd etildi. Umumen 583 insan COVID-19 telükesi sebebinden ekimlerniñ közetüvi altında buluna.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
